ಕ್ರೀಡೆ

ಭಾರತದ ವಿರುದ್ಧ ಪಾಕ್ ಸೋಲು: ಸೋಲಿಗೆ ಇದೇ ಕಾರಣ ಎಂದ ಪಾಕ್​ ನಾಯಕ ಬಾಬರ್​ - Babar

6/10/2024 11:25:00 AM

 


 


Kannada Alert Desk

ನ್ಯೂಯಾರ್ಕ್: ICC ಟಿ20 ವಿಶ್ವಕಪ್ ಪಂದ್ಯದಲ್ಲಿ ಭಾರತದ ವಿರುದ್ಧ ಪಾಕಿಸ್ತಾನದ ವೈಫಲ್ಯತೆ ಮುಂದುವರೆದಿದೆ. ರೋಹಿತ್​ ಪಡೆ ವಿರುದ್ಧ  ಆರು ರನ್‌ಗಳ ಸೋಲಿನ ಬಳಿಕ ಪಾಕಿಸ್ತಾನದ ನಾಯಕ ಬಾಬರ್ ಅಜಮ್ ಸೋಲಿಗೆ ಕೆಲವು ಕಾರಣಗಳನ್ನು ನೀಡಿದ್ದಾರೆ. ತಂಡವು ಒಂದರ ಹಿಂದೊಂದರಂತೆ ವಿಕೆಟ್​ ಕಳೆದುಕೊಳ್ಳುತ್ತ, ಹೆಚ್ಚು ಡಾಟ್ ಬಾಲ್‌ ಆಡಿರುವುದೇ ಸೋಲಲು ಮುಖ್ಯ ಕಾರಣ ಎಂದು ಅವರು​​ ಹೇಳಿದ್ದಾರೆ. ಉತ್ತಮ ಬೌಲಿಂಗ್ ಪ್ರದರ್ಶನದ ಹೊರತಾಗಿಯೂ ಪಾಕ್​ ತಂಡ ಬ್ಯಾಟಿಂಗ್​ ವೈಫಲ್ಯದಿಂದ ವಿಶ್ವಕಪ್​ನಲ್ಲಿ ಮತ್ತೊಂದು ಸೋಲು ಕಂಡಿದೆ.

 

 

ಭಾರತದ ಪರ ಮಿಂಚಿನ ದಾಳಿ ನಡೆಸಿದ ವೇಗಿ ಜಸ್ಪ್ರೀತ್ ಬುಮ್ರಾ (14ಕ್ಕೆ 3) ಮತ್ತು ಆಲ್​ರೌಂಡರ್​​ ಹಾರ್ದಿಕ್ ಪಾಂಡ್ಯ (24ಕ್ಕೆ 2) ಪಾಕಿಸ್ತಾನ ತಂಡವನ್ನು ಸೋಲಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ರವಿವಾರ ನ್ಯೂಯಾರ್ಕ್​ನ ನಸ್ಸೌ ಕೌಂಟಿ ಸ್ಟೇಡಿಯಂನಲ್ಲಿ ಟೀಂ ಇಂಡಿಯಾ ನೀಡಿದ 120 ರನ್‌ ಗುರಿ ಬೆನ್ನಟ್ಟಿದ ಪಾಕಿಸ್ತಾನ ಆರು  ರನ್​ ಅಂತರದ ಸೋಲಿಗೆ ಶರಣಾಯಿತು.

 

ಪಂದ್ಯದ ಬಳಿಕ ಮಾತನಾಡಿದ ನಾಯಕ ಬಾಬರ್ ಅಜಮ್, "ನಾವು ಉತ್ತಮ ಬೌಲಿಂಗ್ ಪ್ರದರ್ಶನ ಮಾಡಿದೆವು. ಆದರೆ, ಬ್ಯಾಟಿಂಗ್‌ನಲ್ಲಿ ನಿರಂತರ ವಿಕೆಟ್‌ ಕಳೆದುಕೊಳ್ಳುವ ಜೊತೆಗೆ, ಹೆಚ್ಚಿನ ಡಾಟ್ ಬಾಲ್‌ ಆಡಿದ್ದರಿಂದ ಸೋಲು ಕಾಣುವಂತಾಯಿತು. ನಾವು ಸರಳ ಬ್ಯಾಟಿಂಗ್​ ತಂತ್ರದೊಂದಿಗೆ ಮೈದಾನಕ್ಕಳಿದೆವು. ಬ್ಯಾಟಿಂಗ್​ ಸ್ಟ್ರೈಕ್ ಬದಲಾಯಿಸುತ್ತ ಆಗಾಗ ಬೌಂಡರಿ ಗಳಿಸುವುದು ನಮ್ಮ ಯೋಜನೆಯಾಗಿತ್ತು. ಆದರೆ, ಇನ್ನಿಂಗ್ಸ್​ನ ದ್ವಿತೀಯಾರ್ಧದಲ್ಲಿ ಬಹಳಷ್ಟು ಡಾಟ್​ ಬಾಲ್​​ ಆಡಿದೆವು. ಮೊದಲ 6 ಓವರ್‌ಗಳಲ್ಲಿ ಹೆಚ್ಚಿನ ರನ್​ ಬಾರಿಸುವ ಪ್ಲಾನ್​ ಮಾಡಿದ್ದೆವು. ಆದರೆ, ವಿಕೆಟ್​ ಕಳೆದುಕೊಂಡಿದ್ದಲ್ಲದೇ, ರನ್​ ಗಳಿಸದಿರುವುದು ನಾವು ಪುಟಿದೇಳಲಾಗದೆ ಸೋತೆವು'' ಎಂದು ಹೇಳಿದ್ದಾರೆ.

 

''ಹೆಚ್ಚಾಗಿ ಚೆಂಡು ಬ್ಯಾಟ್​ಗೆ ಸುಲಭವಾಗಿ ಬರುತ್ತಿತ್ತು. ಕೆಲವೊಮ್ಮೆ ಸ್ವಲ್ಪ ನಿಧಾನವಾಗಿದ್ದಲ್ಲದೆ, ಕೆಲವು ಬಾಲ್​ಗಳು ಹೆಚ್ಚು ಬೌನ್ಸ್ಗಳು ಆಗುತ್ತಿದ್ದವು. ನಾವೀಗ ಕೊನೆಯ 2 ಪಂದ್ಯಗಳನ್ನು ಗೆಲ್ಲಲೇಬೇಕಿದೆ. ನಮ್ಮ ತಪ್ಪುಗಳ ಬಗ್ಗೆ ಎಲ್ಲರೂ ಕುಳಿತು ಚರ್ಚಿಸುತ್ತೇವೆ. ಕೊನೆಯ 2 ಪಂದ್ಯಗಳಿಗಾಗಿ ಎದುರು ನೋಡುತ್ತಿದ್ದೇವೆ'' ಎಂದು ಬಾಬರ್​ ಅಜಮ್​ ತಿಳಿಸಿದರು.

 

ಪಾಕ್​ ವಿರುದ್ಧ ರೋಚಕ ಪಂದ್ಯ ಗೆದ್ದ ಬಳಿಕ ಭಾರತವು 2 ಪಂದ್ಯಗಳಲ್ಲಿಯೂ ಗೆದ್ದು 4 ಅಂಕಗಳೊಂದಿಗೆ A  ಗುಂಪಿನಲ್ಲಿ ಅಗ್ರಸ್ಥಾನದಲ್ಲಿದೆ. ಎರಡು ಸೋಲುಗಳೊಂದಿಗೆ ಪಾಕಿಸ್ತಾನವು ನಾಲ್ಕನೇ ಸ್ಥಾನದಲ್ಲಿದೆ. ಪಾಕ್​ ತಂಡ ಇದಕ್ಕೂ ಮುನ್ನ ಯುಎಸ್​ ವಿರುದ್ಧದ ಮೊದಲ ಹಣಾಹಣಿಯಲ್ಲಿ ಸೋತಿತ್ತು. ಬಾಬರ್​ ಪಡೆಯು ಮುಂದಿನ ಪಂದ್ಯದಲ್ಲಿ ಜೂನ್​ 11ರಂದು ಕೆನಡಾ ವಿರುದ್ಧ ಆಡಲಿದ್ದು, ಟೂರ್ನಿಯಲ್ಲಿ ಉಳಿದುಕೊಳ್ಳಲು ಗೆಲುವು ಅನಿವಾರ್ಯವಾಗಿದೆ. ಮತ್ತೊಂದೆಡೆ, ಭಾರತವು ಜೂನ್​ 12ರಂದು ಅಮೆರಿಕ ವಿರುದ್ಧ ಕಣಕ್ಕಿಳಿಯಲಿದೆ.